Bil-mod il-mod, il-Festa 2026 waslet fi tmiemha. Intfew id-dwal, waqfet il-mużika u l-Pjazza reġgħet lura għar-ritmu tagħha ta’ kuljum. Madankollu, dak kollu li ngħex matul dawn il-ġimgħat u x-xhur ta’ tħejjijiet żgur mhux se jintesa malajr.
Din ma kinitx festa bħall-oħrajn. Kienet sena storika għan-Naxxar, sena li se tibqa’ mfakkra bħala kapitlu importanti fl-istorja tal-komunità Naxxarija u tas-Soċjetà Mużikali Peace.
F’riflessjoni tiegħu dwar din il-festa, is-Segretarju Ġenerali tas-Soċjetà Mużikali Peace, s-sur Matthew Pullicino qal li, għalih personalment, kienet festa diffiċli biex tinġabar fi ftit kliem. Warajha kien hemm xhur sħaħ ta’ preparazzjoni, laqgħat, deċiżjonijiet, telefonati, emails, ħidma ta’ sigħat twal wara l-kwinti u, naturalment, anke mumenti mhux faċli.
Din is-sena kellha wkoll l-isfidi tagħha. Kien hemm mumenti li talbu paċenzja, determinazzjoni u, fuq kollox, għaqda. Madankollu, kienu l-mumenti speċjali li taw sens lil kull sforz u kull sagrifiċċju.
Kienu dawk il-mumenti meta l-Każin kien mimli ħajja, meta tinstema’ l-Banda Peace ddoqq, meta wieħed jara proġett wara l-ieħor jieħu l-ħajja, meta l-Pjazza timtela bin-nies u meta, minkejja kollox, jittellgħu spettakli ta’ logħob tan-nar mill-aqwa. Fuq kollox, kien il-mument li wieħed jara lil Marija Bambina fost il-poplu Naxxari f’din is-sena tant speċjali.
Is-Segretarju Ġenerali saħaq li xejn minn dan ma jista’ jsir minn persuna waħda. Festa ta’ dan il-kobor hija r-riżultat tal-ħidma u d-dedikazzjoni ta’ ħafna persuni li, kull wieħed u waħda bil-kontribut tiegħu jew tagħha, jagħtu sehemhom biex dak li jidher quddiem il-pubbliku jkun jista’ jsir realtà.
F’dan ir-rigward, wassal il-gratitudni tiegħu lill-President tas-Soċjetà, is-Sur Marlon Brincat, lill-membri tal-Kumitat, lis-Surmast u lill-bandisti, lill-membri, lill-voluntiera, lill-ħaddiema, lid-dilettanti u lil kull persuna li b’xi mod jew ieħor tat il-kontribut tagħha matul din il-festa.
Radd ukoll ħajr lill-familji ta’ dawk kollha involuti, li ħafna drabi jkollhom jifhmu u jaċċettaw is-sigħat twal li dawn iqattgħu ’l bogħod minnhom sabiex dak li jħobbu u jemmnu fih ikun jista’ jsir realtà.
Fuq kollox, esprima l-apprezzament tiegħu lejn il-pubbliku u lejn dawk kollha li kienu preżenti u taw is-sostenn tagħhom lis-Soċjetà Mużikali Peace matul dawn iċ-ċelebrazzjonijiet.
Meta wieħed iħares lura lejn din il-festa, ma jibqgħux biss f’moħħu l-attivitajiet organizzati u l-programm imħejji. Jibqgħu wkoll in-nies, l-emozzjonijiet, il-ħbiberiji, is-sagrifiċċji u dawk il-mumenti żgħar li forsi ħadd ma rahom, iżda li flimkien ikkontribwew biex tinbena festa kbira u memorabbli.
Festa storika bħal din ma titkejjilx biss minn dak kollu li rnexxielha twettaq is-Soċjetà, iżda wkoll mill-mod kif dawk kollha involuti għarfu jibqgħu magħqudin quddiem l-isfidi. U huwa proprju dan is-sens ta’ għaqda u kollaborazzjoni li jibqa’ wieħed mill-aktar wirt prezzjuż li tħalli din l-esperjenza.
Is-Segretarju Ġenerali temm billi esprima l-kburija tiegħu li jagħti sehmu fis-Soċjetà Mużikali Peace u f’dak kollu li din tirrappreżenta, filwaqt li rringrazzja mill-qalb lil kull min ta l-kontribut tiegħu sabiex il-Festa 2026 tkun waħda li tibqa’ mfakkra.
Il-festa ċentinarja tal-2026 issa saret parti mill-istorja.
Il-komunità kienet hemm. Għexitha. Ħadmet għaliha. U issa se tibqa’ tgħożżha bħala memorja ta’ sena tassew speċjali.
Grazzi mill-qalb lil kulħadd.