Il-Kumitat jixtieq iħabbar li mil-lum, Mro. Michael Pirotta se jkun qed jieħu lir-rwol ta' Assistent Surmast tal-Banda Peace kif ukoll għalliem tas-sezzjoni tal-qasba.
Michael Pirotta huwa wild Naxxari u beda l-karriera mużikali tiegħu bħala klarinettista ġewwa s-Soċjetà Mużikali Peace, Naxxar. Minn età żgħira, Michael irnexxielu jikseb bosta diplomi minn diversi kulleġġi Brittaniċi u ta kunċerti, kemm bħala solista u anke dik ‘da camera’ għal diversi snin. Michael huwa rebbieħ ta’ żewġ kompetizzjonijiet Nazzjonali organizzati mis-Soċjetà Maltija tal-Arti, Manifattura u Kummerċ u ħadem ma’ diversi diretturi professjonali.
Huwa daqq diversi drabi mal-Orkestra Nazzjonali ta’ Malta u għal perjodu twil kien għalliem ġewwa l-Iskola tal-Mużika Johann Strauss, il-Belt Valletta u s-Soċjetà Filarmonika Nicolò Isouard, tal-Mosta. L-esperjenza fuq il-klarinett laqqatu ma’ bosta nies professjonali minn madwar id-dinja u ħaditu iżur bosta kulturi Ewropej.
Minn ftit snin ‘l hawn, Michael beda jinseġ l-għarfien fuq il-klarinett ma’ dik tal-kompożizzjoni. Huwa kiteb siltiet mużikali għall-banda, ‘da camera’, folkloristċi, solo, u bosta arranġamenti oħra. Preżentement Michael huwa surmast tal-allievi tal-qasba ġewwa t-Teatru tal-Opra Aurora, ir-Rabat Għawdex, kif ukoll il-Maestro di Capella tal-Knisja Filjali tal-Kunċizzjoni tan-Naxxar.
𝗔𝘄𝗴𝘂𝗿𝗶!
L-aħħar aġġornament sar nhar: It-Tlieta, 3 ta’ Diċembru 2024