Soċjetà Mużikali Peace Naxxar

B’sogħba kbira nsellmu l-memorja ta’ Victor Muscat (“Tan-Naw”), Naxxari, li ħalliena aktar kmieni llum. F’dan il-mument ta’ niket, is-Soċjetà Mużikali Peace twassal il-kondoljanzi sinċieri tagħha lill-Familja Muscat, li magħha hemm diversi membri li huma wkoll parti mill-familja tas-Soċjetà tagħna. Ninsabu magħkom f’dan iż-żmien diffiċli u nawgawlkom is-saħħa u l-kuraġġ biex tiffaċċjaw din it-telfa.

Is-Soċjetà Mużikali Peace tesprimi l-awguri tagħha lil Mikhail Grima Agius, mużiċist fi ħdan il-Banda Peace u Rappreżentant tal-Kummissjoni Banda, li kiseb b’suċċess id-diploma Associate of the London College of Music (A.L.C.M.) fil-kategorija Full Drumkit.

Prosit lil Ella Marie Schembri u Mikhail Grima, li llum irrappreżentaw lis-Soċjetà Mużikali Peace fil-Konferenza Nazzjonali għaż-Żgħażagħ fil-Każini tal-Banda, organizzata mill-Aġenzija Żgħażagħ. Matul din il-konferenza ġew diskussi diversi temi marbuta mar-rwol u l-importanza taż-żgħażagħ fi ħdan il-każini tal-banda u s-soċjetà tagħna. Mill-interventi u d-diskussjonijiet ħareġ b’mod ċar kemm l-involviment u l-attiviżmu taż-żgħażagħ huma essenzjali biex jinħolqu opportunitajiet ġodda, jissaħħu l-komunitajiet u jitħeġġeġ il-progress.

Nifirħu minn qalbna lil Ishmael Bonello, Julia Bonnici, Benjamin Chetcuti u Keiran Fenech, studenti fi ħdan l-Iskola Mużikali tagħna, li kisbu riżultati mill-aqwa fl-eżamijiet tal-prattika tal-Klarinett tal-London College of Music Examinations.

Matul l-aħħar xhur, permezz tal-għajnuna mogħtija mill-fond Community Development and Innovation Scheme 2025, sar xogħol ta’ rinnovar fl-Uffiċċju Amministrattiv tas-Soċjetà Mużikali Peace. L-uffiċċju, fejn jiltaqa’ l-Kumitat Eżekuttiv, ġie mgħammar b’għamara ġdida tal-injam, li toffri ambjent aktar xieraq u funzjonali kemm għaż-żamma tal-laqgħat kif ukoll għall-ħażna u l-arkivjazzjoni tad-dokumenti uffiċjali u l-minuti tas-Soċjetà.

Nhar it-19 ta’ Ottubru, waqt seduta tal-Kumitat, il-President Marlon Brincat ħatar lil Mikhail Grima Agius bħala Rappreżentant tal-Kummissjoni Banda fi ħdan il-Kumitat, filwaqt li Stephanie Grima Agius u Jake Cauchi nħatru membri tal-istess Kummissjoni.