Soċjetà Mużikali Peace Naxxar

Is-Soċjetà Mużikali Peace tesprimi l-apprezzament u l-gratitudni tagħha għall-inizjattiva li permezz tagħha ġiet inawgurata sala ġdida fi ħdan il-Ministeru għall-Politika Soċjali u l-Familja, iddedikata b’ġieħ il-memorja ta’ Raymond Chetcuti, li serva fil-kariga ta’ Direttur Ġenerali.

F’isem il-Kumitat tas-Soċjetà Mużikali Peace, Naxxar, insellmu b’rispett il-memorja ta’ Charlie Zarb u nesprimu l-kondoljanzi sinċiera tagħna lill-familja u lill-qraba tiegħu f’dan il-mument ta’ niket u dieqa.

Is-Soċjetà Mużikali Peace kompliet tinvesti fit-tagħmir mużikali tagħha permezz tal-akkwist ta’ Glockenspiel, strument mużikali ġdid li kien meħtieġ għall-attivitajiet tal-banda u li se jservi wkoll bħala għodda edukattiva għall-istudenti li jixtiequ jitgħallmu u jsaħħu l-ħiliet mużikali tagħhom fuq dan l-istrument.

Nawguraw kull suċċess lil Andrè Muscat, membru tal-Kumitat tas-Soċjetà Mużikali Peace, li flimkien ma’ ibnu Mattia, mużiċist mal-Banda Peace, se jkunu qegħdin jippreżentaw it-tieni staġun tal-programm “Il-Festa u Dak li Jsawwarha” fuq RTK 103.

Prosit lil Ella Marie Schembri, bandista u studenta fi ħdan l-iskola mużikali tagħna, li nhar il-Ġimgħa 25 ta' Settembru, kellha l-opportunità tipparteċipa, flimkien ma’ madwar 50 mużiċist minn diversi lokalitajiet f’Malta, f’master classes immexxija mill-U.S. Naval Forces Europe and Africa Band.

Għadek fil-ħin biex takkwista t-tifkiriet speċjali 300 Sena Fostna n-Naxxarin, fosthom il-Ktieb tal-Festa 2026, album mużikali bl-Innijiet Marjani u santa tal-bizzilla b’ritratt antik tal-Bambina. Min jakkwista t-tliet tifkiriet flimkien jingħata ritratt tal-Bambina ta’ daqs A3 b’xejn. Disponibbli minn OTTO Clubhouse, sakemm jibqgħu disponibbli.