Soċjeta' Mużikali Peace Naxxar

Illum niftħu x-xahar ta' Settembru fejn b'differenza mis-snin ta' qabel din is-sena ser ikolna preparamenti differenti għal Festa. Fis-snin l-imgħoddijja stajna ninnutaw li mal-bidu ta' Settembru n-Naxxar jibda jintlibes il-libsa tal-Festa b'ħafna armar mill-isbaħ li jsebbaħ lil Belt tagħna. Illum il-President tas-Soċjeta', s-sur Edward Azzopardi ħass il-ħtieġa li f'isem is-Soċjeta' Mużikali Peace tan-Naxxar jaqsam magħna messaġġ sabiħ fl-okkażjoni tal-Festa 2020.

Viva Marija Bambina!

Illum is-Sibt 29 ta' Awwissu, ninsabu propju fiż-żmien il-Festa fejn għal ħafna minn nies huwa wieħed mill-isbaħ żminijiet tas-sena. Illum qiegħdin llkoll flimkien niċċelebraw it-tmien Sibt tal-Bambina kif ukoll l-ewwel jum tan-Novena. Il-Festa ġġib magħha ħafna mpenn, sagrifiċċji u ħidma b'mod volontarju matul is-sena kollha sabiex tinġabar l-għajnuna kollha meħtieġa biex b'hekk inkunu nistgħu ntellaw programm mill-isbaħ fiż-żminijiet tal-Festa. Sfortunatament din is-sena ser tkun Festa speċjali għaliex minnħabba l-pandemijja ser ikolna niċċaħdu minn ħafna attivitajiet li konna mdorrijin norganizzaw f'dawn il-jiem hekk sbieħ.

Illum 28 ta' Awwissu 2020, ser niċċelebraw llkoll flimkien jum il-ħruġ tal-istatwa minn-niċċa b'mod differenti. Bħal llum il-pjazza kienet tkun ippakjata bin-nies sabiex llkoll flimkien nistennew lill-Banda Peace tidħol fil-pjazza bid-daqq tal-Innu Marċ. Mal-wasla tal-banda fil-pjazza, l-arċipriet kien jibda l-funzjoni reliġjuża sabiex flimkien niftħu l-Festa esterna bl-akkumpanjament tal-banda Peace b'daqq ta' innijiet Marjani.

B'Ħeġġa uħud miż-żgħażagħ tagħna l-bieraħ filgħaxija bdew jippreparaw għal jiem li ġejjien. Dawn ħa jkunu ġranet differenti, imma xorta speċjali għaliex il-Festa ta' Marija Bambina tibqa l-akbar avveniment fil-kalendarju tagħna.

Il-bieraħ il-Ħamis, 27 ta' Awwissu fis-6:30pm saret iċ-Ċerimonja tal-Investitura tal-Ewwel Konanċi fil-Kolleġġjata ta' Marija Bambina fin-Naxxar. Nixtiequ għal darb oħra nirringrazjaw tal-fiduċja u nifirħu lill-W.R. Dun David Gauci, l-ewwel Arċipriet tal-Kolleġġjata, flimkien mal-Kapitlu, fil-ħidma pastorali tagħhom, kburin li s-Soċjeta' tagħna kienet, għadha u tibqa' ta' servizz lin-Naxxar u n-Naxxarin!

Illum ninsabu fis-Seba' Sibt tal-Festa għażiża ta' Marija Bambina u ninsabu ftit ġranet il-bogħod mit-twaqqif tal-Kolleġġjata tan-Naxxar u l-pussess tal-ewwel Kanonċi. Nhar il-Ġimgħa 28 ta' Awwissu 2020 propju fil-ġurnata li ta' kull sena nkunu qiegħdin niċċelebraw il-Ħruġ minn-niċċa ser issir Quddiesa ta' ringrazzjament mill-Kapitlu tan-Naxxar.