Il-ġurnata storika waslet - Żewġ leġġendi tas-snooker se jiltaqgħu wiċċ imb wiċċ fil-Peace Band Club f’Naxxar hekk kif Tony Drago se jaffaċċja lil John Higgins f’partita ta’ wirja biex jiġi ċċelebrat il-100 sena tas-snooker f’Naxxar nhar il-Ġimgħa.
Higgins huwa persuna popolari ħafna fid-dinja tas-snooker u jgawdi popolarità kbira f’Malta. Bla dubju, il-preżenza tiegħu flimkien ma’ dik tal-leġġenda Maltija Tony Drago se tiggarantixxi serata memorabbli għal dawk kollha li se jattendu għal din il-partita ta’ wirja.
John Higgins wera kemm kien kuntent li reġa’ jinsab Malta u li se jilgħab flimkien mal-ħabib tiegħu ta’ żmien twil, Tony Drago.
“Jien tassew kuntent li erġajt ġejt Malta,” qal Higgins.
“L-aħħar darba li lgħabt hawn kien madwar 20 sena ilu, u dejjem kien pjaċir kbir għalija li nilgħab f’Malta. Meta Tony Drago tkellem miegħi dwar il-possibbiltà li nerġa’ niġi hawn, aċċettajt mill-ewwel.
“Bħalissa għandna skeda mimlija ħafna bit-turnamenti tas-snooker, b’kompetizzjonijiet kważi kull ġimgħa. Biex inkun onest, kieku kien hemm persuna waħda biss li għaliha kont niġi, kienet Tony Drago, għax huwa persuna speċjali ħafna u ħabib għażiż tiegħi.”
Min-naħa tiegħu, Tony Drago qal li huwa grat lejn il-Peace Band Club għal din l-inizjattiva u spjega li d-deċiżjoni tiegħu li jġib lil John Higgins Malta kienet ispirata mill-fatt li jqisu bħala l-aqwa plejer tas-snooker ta’ kull żmien.
“L-ewwel nett nixtieq nirringrazzja lill-Peace Band Club talli stednuna hawn,” qal il-“Maltese Tornado - Tony Drago”.
“Din hija idea tassew sabiħa. Meta Joseph Galea tkellem miegħi dwar din l-inizjattiva biex niċċelebraw 100 sena tas-snooker f’Naxxar, kien hemm isem wieħed biss li ġieni f’moħħi – John Higgins.
“Dan il-klabb għamel ħafna għas-snooker f’Malta, u għalkemm hemm ħafna plejers kbar fid-dinja tas-snooker, ma ridtx inġib biss plejer kbir, iżda xi ħadd li jirrappreżenta l-kobor – u dak huwa John Higgins.
“Dejjem kellna relazzjoni tajba ħafna bejniethom u ninsab ferħan li hu hawn għal dan l-avveniment memorabbli.”
Il-president tal-Peace Band Club, Marlon Brincat, spjega waqt konferenza tal-aħbarijiet kif ġiet l-idea ta’ din il-partita ta’ wirja.
“Is-sena l-oħra, Joe Galea infurmani li fl-2026 kien hemm anniversarju importanti ġej - 100 sena tas-snooker fil-band club tagħna - u ssuġġerixxa li nippruvaw inġibu plejer professjonali ta’ livell għoli Malta,” qal Brincat.
“It-tweġiba tiegħi kienet li għandna nagħmlu l-almu tagħna biex dan iseħħ, u għalhekk avviċinajt lill-Ministru għall-Isport Clifton Grima, għax l-appoġġ tiegħu biex jiġi organizzat avveniment bħal dan kien kruċjali. Dr Grima kien ta’ għajnuna kbira biex dan l-avveniment iseħħ.
“Kien hawn li avviċinajna lil Tony Drago, u l-kontribut tiegħu kien importanti ħafna biex dan l-avveniment iseħħ. Minnufih beda jitkellem ma’ ħafna nies u rnexxielu jġib għal dan l-avveniment wieħed mill-kbar f’dan l-isport, John Higgins.
“Il-biljetti għall-avveniment inbiegħu fi ftit minuti biss, u għalina huwa importanti ħafna li l-benefiċjarji prinċipali kienu l-membri tagħna, li huma l-qalb tal-klabb.”
Il-Ministru għall-Isport Clifton Grima qal li din il-partita ta’ wirja se tkun opportunità perfetta biex jiġi ċċelebrat l-isport flimkien ma’ żewġ leġġendi sportivi, Tony Drago u John Higgins.
“Nixtieq nesprimi l-gratitudni tiegħi lejn il-Peace Band Club talli ħadmu tant biex dan l-avveniment iseħħ,” qal Dr Grima.
“Li tara tant rispett bejn żewġ leġġendi tas-snooker huwa tassew sabiħ, u bla dubju din il-partita ta’ wirja hija opportunità mill-aqwa biex niċċelebraw l-isport flimkien.”